Jahresbericht 2018

5. Januar Nöijahrshöck

Das Jahr lüte mr mit Güggeli vom Grill ih. Ds chline Bläch organisiert ä gmüetleche Abe mit
Niederhusers Güggeli –Stang. Merci viumau!

26. Januar HV Bären

Di diesjähregi HV geit ribigslos über d Bühni. Dr Roman füehrt üs suverän dür sini erschti HV.
Witer so!

3./4. März Skiweekend

Üs erwartet am Samsti chli Huduwätter uf dr Pischte. Aber mir gäbe aus… so heimer das
Hammer Vorspise-Büffet wos i üsere Ungerkunft, em Hornbärg, git, meh aus verdienet. Dr
Hüttewart het so Früüd a üs, dasses no es Dibidäbi drüber ih git... u so schlafe mir herrlech u
si am Sunnti fit für bi prachts Wätter d Pischte unsicher ds mache. Häppi Börsdei Küsu u
Merci für d Organisation.

16.-18. März Konzert u Theater

Ä Aera geit ds Änd. Nach Jahrzähnte trummlet dr Fred äs letschtsmau ä motivierti
Theatergruppe zämä wo o das jahr mitem Stück „Der Gyt-Tüüfel“ e huffe Bsuecher uf
Baum lockt. Itz simer aui gspannt wi ds Kapitu Theater ab nächsts Jahr i üsem Verein de
witer geit. O dir, Fred es grosses Merci a däre Steu.

29. April Ständli Werner Spycher

Amene schöne Sunnti Morge spile mir im Jurablickwäg em Werner Spycher zum 90.
Geburtstag es Ständli. Leider ischer gsundheitlech nid so guet zwäg u cha üses Konzärtli
nume dür ds offene Feister lose. Isch villech o besser.. . dr Eint oder Anger gseht nach dr YB
Meisterfiir vom gestrige Abe nämlech chli mitgnoh us…

5. Mai Ständli Remund Holzbou

Remund Holzbau ds Schwarzeburg fiiret 150 jährigs Jubiläum u weiht ds neue Geböide ih. U
mir dörfe das Feschtli mitemne chline Platzkonzärt umrande.

18. Mai Ständli Walter Gerber, Ernst Maurer, Werner Hunziker, Hansruedi Riesen

Vier Jubilare wo das Jahr 80gi wärde tüe sech zämä u lade üs für nes Ständli mit
ahschliessendem Apero im Foyée ih. Es glungne Abe isch ds gsi.

20. Mai Predig Rüeggisberg

Da ds Wätter chli unssicher isch, findet o das Jahr dr Regionau Gottesdienscht ir Chiuche ds
Rüeggisberg statt. D Prediggänger hei fröid a üsere Musig, u mir hei fröid ar Züpfe u Moscht
wos im Ahschluss no git… aber hets letschts Jahr nid nöime no Wurscht ono gä??hmmm

26. Mai Mittelländischer Musiktag Frauenkappelen

Ä schöne Tag verbringe mir ds Frouechappele am Musigtag. Mir dörfe ¾ Stung lang im
Festzäut spile u o we no nid viu Lüt im Zäut si, hei mir ds Goudi drbi. Mit üsere Leistig bim
Konzärtvortrag mitem Stück Kilkenny Rhabsody u üsem Marschmusig Vortrag chümer ds
fride si.

22. Juni Ständli Bertha Hubacher

Amene schöne Friti Abe spile mir dr Bertha Hubacher im Garte es Geburtstagsständli. D
Jubilarin u ihre Sohn hei fröid a üsem Uftritt.

1. Juli Schulfest Neuenegg/ Oberbalm

O das Jahr spile mir ds Neuenegg u ds Oberbalm a de Schulfest. I säge nume läck isch ds
heiss....

1. August Bundesfiir Borisried

Wägem mangelde Räge gits das Jahr kes Höhefüür. Dr Umzug mit üsere Musig findet
natürlech trotzdäm statt. D Ice Hornets organisiere e glungne Abe mit de FireChefs wo für ds
liibleche Wouh sorge u em BZ Chef wo gueti Red zur Feier des Tages het.

5. August Ständli Ruedi Riesen

Es isch, wi de Summer so oft, widermau heiss wo mir am Sunntmorge im Garte vom Bäre em
Riesen Ruedi zum 90iste es Ständli spile. Ds ahschliessende Apero heimer nis so meh aus
verdient.

13./14. Oktober Herbstfest

Viva Italia! Unger däm Motto steit üses hüürige Konzärt. Vo wäge ds Italie isch aues chli
lockerer… das ahspruchsvoue Programm schluchet üs Musikante veie chli. D Gescht hei aber
Fröid u füehle sech, mit de Spaghetti wos us dr Chuchi git, fasch wi i de Ferie. U o am
Sunnsti piugere hüffe Gescht bim schönste Wätter uf Baum für d Baumbärg Musikante u ds
Joderquartett Härztön cho ds lose.

9. Novämber Basar

Am Namiittag zeige mr de Baumer Ching wie me uf üsne Instrumänt spiut u am Abe zeige
mr de Gescht mit emne chline Konzärtli was mr musikalisch druf hei. Das mr dr Schnaps
muess mitnäh weme Schnaps wott triche, wüsse mr afe aber wes mitem Service so witer
geit müesse mr künftig o ds ässe säuber mitnäh, wemer a däm Event nid wei verhungere.

25. Dezämber Wiehnachtsgottesdienst

Das unger de Musikante liechters Ahspannig isch ufcho, wo sech churz vor Predig beginn
usesteut, dass ke Schlagzüger da isch, hei d Gescht nid gmerkt, sie hei sech ab där sehr
musikalische Predig erfröit. U dr Chrige wo churzerhand aus Schlagzügerin ihgsprunge isch,
sig a där Steu es Chränzli gwunde!

30. Dezämber Ständli Martha Spycher

Ds Jahr schliesse mr mitemne Ständli zum 85. Geurtstag vor Martha Spycher ab. Ä rächti
Tschupelete Gescht u es richhautigs Apero steit für üs imSchueuhuus parat, dass mr nis
zwüsche au dene Feschttäg no mau so richtig chöi d Büsch vou schlah.