Jahresbericht 2019

• 4. Januar Nöijahrshöck

Mit auerhand Würst sterche mir üs am disjährige Nöijahshöck organisiert vo de Bäss, Posune um Schlagzügregister. Merci viumau für dä gmüetlech Abe.

• 25. Januar HV Bären

Mit Schwarte u Bratwürscht geits grad witer. Nachem ds Nachtässe füehre mir üsi 119 HV düre. Ds diskutiere git das Jahr ume mau wär wiviu bi Wartige u Reperature vo de Instrumänt säuber ds zahle het.

• 9./10 März Skiweekend

Trotz huduwätter fresä üser Schneefreaks am Samsti wi di pickte über d Piste. Ds Apero Buffet ufem Hornbärg isch o das Jahr wider ds Highlight vom Abe. Am Sunnti möge aber nume no d ganz Hertä uf d Pischte, di angere tüe sech lieber chli dr Gastwirtschaft ir Region widme.

• 15.März Ständli Hugi Ruedi

Im Bäre ds Oberbalm dörfe mir üsem Ehremitglid zu sim 95. Geburtstag spile. Die vile ahwäsende Gerscht hei fröid a üs u mir hei durchus Fröid ar Hamme um Hardöpfusalat wos im Ahschluss git.

• 12. Mai Ständli Wyss Johannes

Amene chüehle Sunnti morge spile mir ir Brüche zum 90. Geburtstag. Üses Ständli chunt guet ah, di chaute Fingere hei sech auso glohnt.

• 18.Mai Probesamstig

Vouer Elan rapse mr registerwiis uf där Slowenien Rhabsody dasume. U langsam aber sicher bringe mr dä 7/8 Takt i üser Chöpf. Sterche tüe mir üs am Mittag mitemne feine Menü vom Wanner Party Service.

• 24./26. Mai Vorbereitungskonzert

Zur Vorbetreitig ufe Kantonal Musigtag spile mir am Friti 24. u Sunnti 26.Mai zämä mit dr Musiggseuschaft Zimmerwald ir Chiuche ds Oberbalm u ds Zimmerwald. Es tuet guet vor Publikum ds Spile, so merke mr nämlech dass mrs scho veie chli chöi u eigentlech nid so Angscht müesse ha vor däm Ufgabestück.

• 22.Juni Kantonaler Musiktag

Itz isches so wit: Mir hei üse gross Uftritt ds Thun. Leider isch d Jury vo üsne Darbietige sowou ufem Marsch sowi bim Konzärtvortrag nid so überzügt. So schaffes mr leider nume uf di hingere Räng. Dr Chopf löh mr aber nid lang la hange schliesslech wärde d Brigitte Schänk, d Marianne Burren du Monika Guggisberg zu Kantonale Veteran geehrt u das wott doch gfiiret wärde. U die wo no möge fiire bi Büehlers dahei no bis id Nacht iche. Merci a där Steu für d Gastfründschaft.

• 30.Juni Schulfest Neuenegg/ Oberbalm

Alle Jahre wider… begleite mir ds Nöiienegg uds Oberbalm d Schüeler dür ds Dorf… u o fasch alle Jahre wider isches heiss.

• 1.August Bundesfiir Borisried

Wi au Jahr si mir ar oberbaumer Bunderfiir mit üsere Musig tatchräftig drbi. Leider meints dr Petrus nid so guet mit üs Schwizer u so fahts uf de letschte paar Meter vom Umzug afe rägne u verschücht d d Gescht u üs Musikante schnäu wider ist Zäut.

• 11. August Ständli Riesen Herta

Amene wunderschöne Sunnti Morge spile mir dr Jubilarin u ihrne Gescht zum 85. Geburtstag. Mir gniesse aui zämä ds Apero u d Sunne.

• 14. August Abdankigsgottesdienst Werner Spycher

Da üses Ehremitglied im Auter vo 91 verstobe isch, begleite mir dr Gottesdienst mit üsne Kläng.

• 1. September Predig Oberbalm

Dr Regionau Gottesdienst wo mir das Jahr begleite findet ds Oberbalm ir Chiuche statt. Nachdäm mir d Perdiggänger mit üsere Musig entzückt hei, erfröiie mir üs am Imbiss wos im Ahschluss no git.

• 6. September Truurfiir Christian Widmer

Leider isch üses ehemalige Mitglied mit 31 plötzlech usem Läbe grisse worde. Ä Delegation vo üs erwisst ihm die letschti Ehr u nimmt am Abschied teil.

• 6. Septämber Plouschabe bi Trittibachs

Dr Roman u dr Chrischu wärde das Jahr 30i u lade üs deswäge zumene gmüetleche Abe im Schopf ih. Mir gniesse ds überus feine ÄSSE vom Grill u höckle gmüetlech näbem Öfeli zämä.

• 12. September Ständli Wyss Otto

A däm Donnsti abe spile mir am Jubilar ds Oberbalm im Dorf zu sim 85. Geburtstag. Mir müesse aber pressiere mit spile denn- es wird schon glei Dunkel.

• 12./13. Oktober Konzert und Theater

Jungs Bluet het ds Zepter i sache Theater spile übernoh. Mitem Stück «Eimol New York« locke mir hüffe Bsuecher uf Oberbalm. So vou isch d Haue bi üs äue scho lang nüme gsi. Merci viumau Küsu Hostettler u dire Crew für ds glungnige Wuchenänd.
Ah ja no öpis: Däichet bitte aube dra öier sibe Sache rächtzitig zum Schueuhuus us ds näh-bevors gsplosse wird. Merci!

• 8.Novämber Basar

Am Namitag zeige mir de Baumer Ching was me bi üs aus für Instrumänt chönnt spile. Wider du de Föteli gseht isch ds Inträsse gwüss veie da gsi. Ds Abeprogramm gstaute mir o das Jahr wider mit dr Trachtegruppe zämä.

• 16. Novämber DV BKMV

Im früsch renovierte Casino ds Bärn findet die diesjährigi Delegierteversammlig start. Ühh wüsse die viu ds Brichte. Umso me erfröie mir üs ar flotte Särviertochter im Anker. Am Namittag fiire mir de dr Ärnst Guggisberg wo mit 50 Jahr aktives musiziere zum kantonale Ehreveteran geehrt wird.

• 25. Dezämber Wiehnachtsgottesdienst

Läck hei mir viu gspiut a dr diesjährlige Wiehnachte, dr Pfarrer isch ja chum zu Wort cho. Aber wär das nid scho gnue gsi, verkündet dr Pfarrer am Schluss no weler 3 Stück mir itz no zu Usgnag spili, drbi wäre doch 2 drvo aus allfälligi Zuegabe dänkt gsi. Janu, schön isches glich gsi.